Nikolle Loka-Në syrin e ciklopit

Syrit të ciklopit ti i afrohesh nga sipër,
ndërsa unë i afrohem nga poshtë;
mos të paftë syri i lig,
mos të paftë syri i keq,
mos të paftë syri i mbrapshtë!
Në syrin e ciklopit
nuk sheh përnjëherë dy njerëz,
njëri i bën hije tjetrit,
veç kur dritë e hënës kishte me i dashtë,
dalin prej kllapisë të verbërit.
Ciklopi sheh,
e syri i nxjerr flakë,
prej flakës së vet po digjet.
Dikush ngrohet pak më larg,
kërkon të përfitojë prej të ligut.