Natasha Limaj-SI TORTA QERSHINË

Puthjen rrëshqitur në faqe
Porsi motra të vëllanë…
Gërshetuar përmbi supe
Duart’shpinës sime ranë…
Tmerrësisht Ti…, më mungoje
Zgavër boshatisur jeta…
Sherrnaja pak sheqerosur
Më shumë…, ç’është e vërteta!…
Pjesëz imja, copëz jotja
Mozaik me kompozim
Krijatura” tretësirë “
Shpirti yt në shpirtin tim…
Dëshirën , ç’ma lakuriqi
Muzë-rebelja çakërdisur…
Akoma më ndezur tënden,
“Mish e thua” të puthitur…
Me njëri-tjetrin , kurr ngopur
Bashkë qëndisur përjetësinë…
Sherrnajën pak sheqerosur
Kemi si torta qershinë!…