Përreth rrotull Rrapit
Shkon një vetull hënë
Gërshetat ja kapi
Dega hije rëndë
Ishte Pashk e vogël
Me hare të madhe
Poshtë zbrisnin shënjtorët
Kapeshin në valle
Ajo gërshet zënë
Si sorkadhe briri
Dorën në degë vënë
Zbuluar qesh gjiri
Një tufë djemsh behari
Si rrebesh i vjeshtës
Kush të shkon i pari
T’ja shplekste gërshetën
Nga valle stuhia
E lëshuan dorën
Erdhën djemëria
Mbritën dhe shenjtorët
Unë puthja cigaren
Nëpër mjegull tymi
Shikoja beqaren
Ku do i shlodhej syri
Ai u nis shtizë
Syri i qëruar
Gotën e rakisë
Ma thërrmoi në duar