bëri plaçkat gati e dashur
unë po shkoj t´i pres biletat
më në fund erdhi edhe ky moment i pritur
futi të gjitha plaçkat në valixhen e ëndrrës
që po e shohim sa herë po kalon hëna mbi Zabel
pastroje mirë banesën e dashur
fshije krejt pluhurin e mallit
dritaret pastroji nga etja e syve tanë
kujdes mos i harro ëndrrat e fëmijëve
as ato pak fjalë shqip që i dinë
sepse u duhen kur të luajnë me fëmijët e lagjes
që mos të mbesin edhe atje të vetmuar
duke i shikuar nga qoshi i shtëpisë sonë
dhe kur t`i bajsh gati të gjitha
afrohu te shtrati im e dashur
ama shumë ngadalë
në maje të gishtave të këmbëve
që t´mos ma prishësh ëndrrën
vetëm shikomë a po marr frymë