A më mësoni të urrej,
se ndoshta shëron dhimbjet?
A më mësoni të harroj,
se ndoshta ndreq gabimet?
Sa dua të mësoj
ta gjej ku është shkruar,
ta lexoj pa pushim,
ndoshta… është për t’u harruar.
Shfletoj fletë të tëra me radhë,
i lexoj me ëndje,
por një fletë e grisur është në radhë—
çfarë kishte shkruar aty, vallë?
Mundohem ta gjej faqen,
ta ngjis përsëri në libër,
por faqja është grisur gabimisht
dhe nuk ngjitet më me ngjitës.
Dhe librin e shfletoj,
plot faqe të tjera;
asgjë nuk duket interesante,
edhe pse janë fletë të reja.
E marr librin në dorë,
duke e shtrënguar fort,
dhe kërkoj ta djeg fare…
por libri duhet lexuar deri në fund.