N’ato lëndina, n’ato korije
Me aromë shkoze e lajthie
T’prita mike që të vije
Sorkadhe e bukur nazelie
Veshur me nur vajzërie
Porsi hëna mbi mal kur bie
Si lis me rrema të t’bëja hije
Rrezja diellit n’sy kur t’bie
Kur nëpër gërxhe n’ato brinja
Çobankë t’mblidhje dëllinja!
S’erdha djalë se m’zuri nata
Monopateve unë e ngrata
Mblodha shpatit ca shkarpa
Për netët e dimrit t’gjata
T’digjen mes puthjesh t’zjarrta
Kur t’bëhem prushi e ti flaka
Tek m’ledhaton flokët e gjata
Në stane, ahure, nëpër stalla
Si shqiponjë mali unë do vij
Kur t’dalësh djal-o me bagëti!
Mos më thuaj që është von’
Je ilaç shpirti që m’shëron
Çoban i ri jam n’profesion
Kam zemrën që dashuron
Vetëm ty sy gazelë kërkon
Si bilbil lumturia m’këndon
Gjithë lodhjen ma largon
Imja çobankë kur m’ledhaton
Në kasollen e ndërtuar me gur’
Pres t’vish mallueshëm si dikur!
Në rrugicë n’atë çarshi
Po vij i dashur, pritmë ti
Të t’përqafoj, t’më mbash n’gji
T’kam thesar, të shtrenjtë flori
E jotja jam, e ëmbël qershi
Lastar i pjekur, i bardhë, i zi
Mollë, dardhë, portokall, kajsi
Ti dhuroj djalë në përjetësi
Deg’ m’deg i kam mbledhur
Buzëve prush për ti derdhur!
Në livadhe kodrinë m’kodrinë
Nga Vermoshi në Janinë
Shiu m’zuri, m’lagu të zinë
Duke mbledhur trëndelinë
Për ty vashëz-o, bjondinë
E gjithë bota le ta dinë
T’kam pranverë në çdo stinë
Diell e hënë që jetën m’ndrinë
Pa ty dhe yjet s’vezullojnë
E bukura ime, moj xixëllonjë!
Eja djalë të ndihem princesh’
Me shkëlqim n’sy do m’gjesh
Gjithnjë tënden të më kesh
Ti luan, unë luanesh’
Mbret ndjenjash përherë t’jesh
Porsi dielli që del mes resh’
Jam çobanesha mbretëresh’
I imi perëndi, e jotja perëndesh’
S’dua kurrë të mungosh ti
Jemi skllevër të s’bukurës magji!
Po vij shpirt t’puth ato sy
Betohem, s’kam për t’zhgënjy
Përmbys botën kam për t’kthy
T’shpërthejnë ndjenjat pa kursy
Jam thëngjill i djegur për ty
Zemrat tona mbyllur në dry
Askush s’mundet t’hyjë aty
Kemi çelsin veç ne të dy
T’hapim portat e lumturisë
Në kështjellën e dashurisë!