Poetja Yoo Dong AE ka lindur në Namhae, në Provincën Gyeongnam të Koresë së Jugut. Shkollën e mesme e ka përfunduar në Jinju, e më pas Shkollën Kombëtare të Mësuesve në Jinju dhe Universitetin Hansung, ku u diplomua për Gjuhë – Letërsi Koreane. Pas një karriere të gjatë si mësuese në shkollën fillore, doli në pension. Debutimi i saj letrar ndodhi në vitin 1992 në rubrikën e poezisë të revistës “Munyesajo”.
Aktualisht, mban postin e Nënkryetares së Shoqatës Koreane të Letërsisë Botërore. Ka shërbyer gjithashtu si Sekretare e Parë e Përgjithshme e Shoqatës Letrare në Gangdong dhe si Presidente e Shoqatës Letrare në Gurye.
Ndër përmbledhjet e saj poetike përfshihen:
- “Me lulet që lulëzojnë brenda meje – (2017), mbështetur nga Fondacioni Kulturor Jeonnam,
- “Dritë dielli mbi porcelanin e thyer – (2019),
po ashtu i mbështetur nga i njëjti fondacion.
Yoo Dong Ae ka kontribuar në antologjinë poetike “Ëndrrat e ujit të detit”.
RRUGA E LULEVE TË PJESHKËS
Jashtë dritares sime,
përgjatë rrugicës së biçikletave,
lulet e pjeshkës kanë lulëzuar.
Në ditën me diell,
atë udhë do të përshkoj
teksa pranvera brenda meje
ende e lagësht nga aurora është.
Në pasditen pas shiut,
vetëm gjethet lëkunden në erë,
në çdo vend ku lulet kishin qëndruar,
një dritë e përkohshme shuhet.
Ah, ditët e lulëzimit,
sa të shkurtra jeni….
(Përktheu: Angela Kosta)