Libri titullohet “Cerco di dirti” (Matem të të them…) dhe shoqërohet nga imazhet e fotografit Biagio Fortini
Sapo ka dalë nga shtypi libri i ri i poetes Irma Kurti, i shoqëruar me imazhe të fotografit italian Biagio Fortini. Vepra titullohet “Cerco di dirti” (Matem të të them…) dhe mban logon e shtëpisë botuese Ukiyoto. Ky është libri i saj i 32-të në gjuhën italiane dhe i katërti me poezi dhe fotografi që autorja boton në bashkëpunim me fotografin dhe piktorin Biagio Fortini pas “L’alba tinge tutto di luce” (Agimi lyen gjithçka me dritë) të botuar nga Immagine Arte, 2025.
Lidhur më krijimtarinë e poetes shqiptare, botuesi i Alessandria Today Magazine, Pier Carlo Lava, shkruan: “Irma Kurti, një poete e jashtëzakonshme, na drejton në labirintin delikat të emocioneve njerëzore me përmbledhjen e saj më të fundit me poezi. Ky kapitull i ri në karrierën e saj letrare mbresëlënëse shquhet për thellësinë e reflektimeve dhe aftësinë për të prekur zemrat e lexuesve. Lexuesi e gjen veten kështu të përfshirë në një simfoni ndjenjash që zbulojnë brishtësinë e jetës, luftën për mbijetesë dhe pranimin e pashmangshëm të lamtumirës. Sinqeriteti me të cilin Kurti ndan përvojën e saj personale u shton një nivel autentik dhe njerëzor poezive të saj, duke e bërë çdo varg një përvojë të përbashkët.”
Ndërsa poetja dhe kritikja letrare Vesna Andrejevic shkruan kështu për krijimtarinë e poetes: “Poezia e Irma Kurtit është e pastër, e thjeshtë dhe e bukur në sinqeritetin e saj, aq bindëse, sa prek menjëherë telat e zemrës me një lloj “naiviteti”, pikërisht atë që kanë vetëm fëmijët dhe poetët. Në të vërtetë, në vargjet e Kurtit gjithçka duket e thjeshtë dhe e lehtë, po ndërkaq, të shkruash poezi në një gjuhë tjetër, është një përpjekje herkuliane apo një mundim si ai i Sizifit. Pra, një punë e vështirë, intensive, asnjëherë e vlerësuar sa duhet nga vetë folësit e gjuhës amtare, por prapëseprapë një mënyrë e çmuar për të pasuruar si shpirtin human, ashtu edhe atë “kulturor”, që na përket sipas zgjedhjes, rrjedhës së ngjarjeve, jetës e kështu me radhë”.
Vesna Andrejevic lidhur me artin e fotografit Biagio Fortini shkruan: “Një udhëtar i apasionuar në vende të ndryshme të botës, përmes fotografive të tij, Fortini na çon në botën e poezisë dhe prozës me imazhet e tij, të cilat me vite përvoje dhe përkushtimi janë bërë kopertina të mbi shtatëdhjetë veprave letrare. Pikërisht këtu fillon sinteza e vërtetë e përvojës së tij, por edhe e përvojës sonë artistike. Një zbulim i vërtetë i imazheve të mrekullueshme të natyrës, fytyrave, ngjyrave, emocioneve, ndjenjave, ngjarjeve, ndryshimeve të stinëve, humorit dhe tingujve të heshtur, por shumë të dukshme për syrin gjithmonë të gatshëm dhe kurioz të profesionistit, të gjitha këto, të marra në vendin e duhur në kohën e duhur dhe që shpërfaqen me dorën e sigurt dhe shpirtin e butë të artistit të madh. Fotografitë e Biagio Fortinit flasin vetë. Kjo aftësi e jashtëzakonshme, e shoqëruar me një ndjeshmëri të madhe dhe më pas e përkthyer në dëshirën e dukshme për të ndarë emocionet me publikun, vërehet në imazhet spektakolare të natyrës, të bëra në vende të ndryshme dhe të largëta nga vendlindja e tij. Fortini është pra një fotograf i lëvizjes.”
BIOGRAFIA:
Irma Kurti është poete, shkrimtare, autore e teksteve të këngëve, gazetare dhe përkthyese. Ka filluar të shkruajë e të botojë poezi që në moshë të vogël. Për poezinë dhe prozën i janë akorduar 100 çmime në konkurse të ndryshme letrare në Itali e Zvicër, 20 prej të cilave kanë qenë çmime të para. Përveçse në Shqipëri, ka fituar gjithashtu çmime në konkurse letrare ndërkombëtare në Greqi, ShBA, Kanada, Filipine, Liban dhe Kinë. Ka shkruar rreth 150 tekste këngësh dhe është pjesëmarrëse në festivalet e muzikës së lehtë në Shqipëri, Kosovë dhe Maqedoninë e Veriut.
Në vitin 2013 fitoi çmimin ndërkombëtar “Universum Donna” për letërsinë dhe emërtimin “Ambasadore e Paqes” nga Universum Academy dhe Universiteti i Paqes në Lugano, Zvicër.
Irma Kurti është anëtare jurie në disa konkurse letrare në Itali, si dhe përkthyese pranë Fondacionit “Ithaca” në Spanjë. Ajo ka botuar mbi 110 vepra, që përshijnë libra me poezi, prozë dhe përkthime. Të gjitha librat i dedikohen kujtimit të prindërve të saj të dashur Hasan Kurti dhe Sherife Mezini që e kanë përkrahur dhe inkurajuar në çdo hap të rrugëtimit letrar.
Irma Kurti është një nga poeteshat shqiptare më të përkthyera dhe më të botuara jashtë kufijve të Shqipërisë. Librat e saj janë përkthyer dhe botuar në 23 vende të botës.
