Një udhë pambarim, e gjatë,
më takon që ta bëj shpesh,
me kilometra malli e mat,
distancën që kemi mes nesh!
Ngre stacione dashurie,
në një gur për ne të dy,
ku ulen, pushojnë dhe yje,
vetëm njëri zbret për ty!
Behet numër për distancë,
me një shifër, jo me dy,
sa kilometra e gjatë,
vjen në kohë kjo dashuri?!
Një distancë sa një puthje,
largësi, dy buzë larg,
me dëshirë, por dhe me lutje,
më vjen e më ikën prap!
Në një gur koha u ndal,
me numër puthjesh u mbyll,
i lexon çdo udhëtar,
nuk bën kryq, por bën yll!
Dora bën yllin avash,
fshehur malli nëpër xhepa,
ç’është ky kilometrazh,
që mbaron me pesë cepa?!
Do takohemi një ditë,
ta shuajmë mallin aty,
ta lëmë gjurmën të ylltë,
dehur nga kjo dashuri!