Herë-herë më duket se të dua fort.
Kupto një të dua, jo thjeshtë germa
fort përmallshëm, të ndryj në gjoks
Më sakatos mendimi që ti s’ je imja
Si pendël në ajër më sjell në duar
Më merr si gjethe më tret në erë
Si duhet një grua e pata harruar
T’i bie tërmet në një gotë verë
Lëshoi pra sytë mbi qafën time
Shih se si dridhen damarët nën jakë
Mbështetem murit që të mos bie
Tash jam një burrë, si trimi pa armë
Ti që jeton si kryevepër e Zotit
Për të t’u lutur, unë që të ndal
Të bie më gjunjë, si dikur moti
Dhe po s’më deshe, do të të fal !