Fol me mua moj puhizë,
tek vërvitesh tutje-t’hu,
fustan-grisura në drizë,
shtatin dredhur…kuturu…
Pas dritares përshpërit,
nëpër perde fshehur rri,
rendur xhamash çuçurit,
çupë mistre më qenke ti…
Herë-herë keq mërzitur,
nis flladon porsi lugate,
hovin ndal krejt papritur,
buzët lagur gjokse nate…
Fol me mua moj puhizë,
vëngër sytë hedhur ke,
fustan-grisura në drizë,
fërshëllen një fjalë s’the…