Molla e jetës
ka lé e kafshueme
e na e kem pa gjith
veç gjysën e Hanës qi ndrin.
Kah i mbardhen brijt tokës,
lypim nji krah
me na rrethue,
s’e tjetri flen
n’pikllim…
Jan terun kmishat Nân,
e s’ban me i lân
shtroja për Hanën..
Asht e bukur ajo,
e shkon e i hin n’lkur
é e ban drit….
Lem Nân
se shkoj si véri
n’nji krah
i pshtjelli vrik.
N’mos ardht shtegit t’malit,
n’gardhie andrrash
kam me e prit…
Ikën netët e gjata,
u bënë zogj të bardhë
t’grishur lartësive.
Në vend të qirinjve
ndrinë flaka e shkrepëseve
që ndizen e fiken
si dritë fari..
Më shkrove se të kish mbaruar
një vazo reçel ftoi,
e më përgëzove për shijen e mrekullueshme..
I marrë…
Pema ime e ftoit nuk piqet kurrë,
lulet flenë mbi tryezën time.
Të paktën në një stinë të vetme
kafen mëngjeseve
e pi me aromën
tënde….