Arsyen e ka zënë gjumi letargjik,
në gjendje kome ndoshta ndodhet,
mos i kanë dhënë tepër analgjezikë,
a mos si kavie vuan e keqpërdoret!
Ia hoqën vlerat arsyes, e zhveshën,
këto vlera mosarsyes ia dhuruan,
me arsyen seç u tallën dhe qeshën,
mosarsyen me sevda e zbukuruan.
Mosarsyeja bëri ashtu siç dinte,
dhe gjithçka në tallava ajo e ktheu,
për qejfe e pasuri kokën seç linte,
ëndrrat për një normalitet keq i theu.
Pritën gjatë që mosarsyeja të piqej,
por ajo kurrë nuk mund të ndodhte,
vetëm kur nga froni qafe të hiqej,
ndoshta kjo arsyen do ta zgjonte…