Shkruan Zymer Mehani
Gjuha nuk është thjesht mjet komunikimi; ajo është pasqyra më e saktë e mendimit, e kulturës dhe e karakterit të njeriut. Sidomos për ata që synojnë ta drejtojnë shtetin, fjala e thënë nuk është kurrë e pafajshme. Ajo peshon, mbetet dhe gjykon. Përmes gjuhës, udhëheqësi zbulohet para se të veprojë; ajo e identifikon më qartë se çdo program politik se kush është dhe çfarë përfaqëson.
Një gjuhë e varfër, fyese apo e mbushur me urrejtje tregon mendësi të kufizuar dhe mungesë përgjegjësie. Një gjuhë e dhunshme paralajmëron një pushtet të dhunshëm; një gjuhë përçarëse paralajmëron një shtet të përçarë. Fjalët janë prova e parë e respektit ndaj qytetarit dhe e ndjenjës së përgjegjësisë ndaj së ardhmes së përbashkët.
Ai që synon pushtetin duhet ta dijë se fjala është betimi i parë publik. Para se të nënshkruhen ligje, nënshkruhen fjalë në ndërgjegjen e popullit. Kur gjuha shndërrohet në mjet manipulimi, përbuzjeje apo mashtrimi, ajo e zhvesh folësin nga maska dhe e nxjerr lakuriq para historisë.
Një shtet nuk ndërtohet me sharje, as me përçmim, as me arrogancë verbale. Ai ndërtohet me fjalë që bashkojnë, që qartësojnë, që japin shpresë dhe përgjegjësi. Gjuha e udhëheqësit duhet të jetë e matur, e drejtë dhe e ndershme, sepse ajo formëson jo vetëm diskursin publik, por edhe klimën morale të shoqërisë.
Prandaj, ju që synoni ta drejtoni shtetin, kini kujdes me gjuhën. Ajo nuk ju shërben vetëm për të folur, por për t’u zbuluar. Në fund, populli mund të harrojë premtimet, por kurrë nuk harron mënyrën si iu fol. Gjuha ju identifikon cilët jeni – sot, nesër dhe përpara historisë.
