Libri me tregime ,,Përjetësia” vjen si rezultat i një përvoje të gjatë krijuese e më përkushtim , në krijimtarinë letrare e sidomos me tregime të zhanrit historik. I rritur në një trevë me një trashëgimi të pasur historike, kam arritur të vjelë kujtimet e luftëtarëve të disa periudhave historike e që më pastaj i kam shtjelluar në formën artistike përmes tregimeve. Ndaj edhe titulli i librit ,,Përjetësia” ka simbolikën e vetë dhe në një formë sublimon esencën e narracionit të këtij libri.
Është karakteristike që tregimet e këtij libri përveç elementeve historike kombinohen edhe me elemente mitologjike që do të nxit kureshtjen e lexuesve t’i përpij tregimet me një frymë. Leksiku i pasur që përdoret në këto tregime vjen si rezultat i një kujdes të veçantë që kam treguar ndaj gjuhës. Çdo tregim ka një prelud si hyrje ku është përzgjedhur një sentencë nga personalitete të shquara nga fusha e letërsisë, historisë, shkencës dhe popullit. Po ashtu pothuaj shumica tregimeve kanë nga një rrëfim dramatik i ndarë në nëntituj që shpeshherë ngjanë me një dramë shumakteshe.
Ajo çka është me rëndësi jam munduar të ruaj nivelin artistik pothuaj në 42 tregimet që përbëjnë këtë libër. Ky libër me materien që përfshihet në të mund të shfrytëzohet
edhe në lektyrën shkollore duke marr parasysh dimensionin dhe laryshin tematike qoftë në aspektin historik, romantik, miteve por edhe ngjarjeve reale.
Struktura e librit është ndërtuar edhe në aspektin kronologjik të ngjarjeve që zhvillohen në nën qiellin e Kosovës. Personazhet e këtyre tregimeve janë luftëtarë të lirisë nga periudha e lëvizjes kaçake, lufta e Drenicës së tribunit Shaban Polluzha e deri te lufta e UÇK-së. Defilojnë aty edhe emra njerëzish të zakonshëm por edhe emra realë të dëshmorëve dhe viktimave civile të luftës së fundit në Kosovë.
Përveç narracionit të vrojtuesit (rrëfimtarit) të ngjarjeve në këto tregime ka edhe shumë dialogë mes personazheve ku kam përdor një arsenal të leksikut popullor sidomos kur është fjala kur protagonistët janë njerëzit e moshuar. Ngjarjet përshkruhen me saktësi duke ruajtur kompozicionin e kohës dhe hapësirës.
Duke marr parasysh hapësirën gjeografike kam përshkruar jo vetëm natyrën, por edhe toponiminë e pasur të vendbanimeve.
Ndonëse temat e trajtuara kryesisht janë të natyrës historike, herë- herë kam bërë digresione, duke futur ndonjë skenë idile të dashurisë se të rinjve, apo plagën e mërgimit që ende është aktuale dhe nuk na shqitet dot. Me të njëjtin ritëm rrëfimi kam na sjell edhe disa tregime që lidhen me aktualitetin e përditshmërinë ku pasqyrohen ambiciet egoiste të njerëzve për pushtet, shpirtngushtësia e hipokrizia.
Në përgjithësi këto tregime jam munduar të ruaj nivelin artistik dhe si të tilla mendoj e bëjnë këtë libër të pëlqyer dhe të lexueshëm.
Drenas, mars 2025