Shkruan Fatmir Z Çitaku
Edicioni i parë mbarëkombëtar i festivalit tradicional të flisë Podujeva u bë dje qendra e një manifestimi unik kulturor e kulinar, ku u mbajt për herë të parë “Fli Fest 2025”, edicioni i parë mbarëkombëtar i festivalit kushtuar flisë – ushqimit tradicional të Llapit. Në atmosferën festive,
Podujeva priti qindra mysafirë nga Shqipëria, Shkupi, Tetova, Presheva dhe shumë vende tjera, ndërsa mërgimtarët e shumtë që ndodhen në pushime iu bashkuan këtij manifestimi duke e kthyer në një festë të madhe mbarëshqiptare.
Flija – më shumë se ushqim Në fjalën e hapjes, organizatorët theksuan: “Flia nuk është thjesht ushqim; është durim, art, dashuri e pjekur ngadalë me kujdes e përkushtim. Në çdo shtresë ka histori, ka nënë, ka gjyshe, ka kujtime që nuk shuhen.” Ky mesazh përmbledh frymën e festivalit: flija si kujtesë dhe si simbol i mikpritjes shqiptare. Një festë e lirisë dhe e kujtimit Manifestimi nuk ishte vetëm kulturor.
Në fytyrat e shumë nënave e baballarëve u panë lot gëzimi, që përziheshin me kujtimin e sakrificës së dëshmorëve dhe rrugëtuesve të lirisë. Festivali u shndërrua kështu në një ditë kujtese dhe nderimi për brezat që sakrifikuan, por edhe për nënat e gjyshet që me mundin e tyre e mbajtën gjallë popullin përmes sofrës e bukës së përditshme.
Nga Dardania e lashtë në Podujevën e sotme Ky manifestim solli në vëmendje edhe lashtësinë e trevës së Llapit. Nga koha iliro-shqiptare e Dardanisë e deri sot, ky popull ka ditur të mbijetojë dhe të ruajë gjuhën e traditën, duke e bërë flinë pjesë të identitetit të tij.
“Nga Tetova në Tiranë, nga Ulqini në Preshevë – sot jemi një, një popull, një kujtesë, një aromë që na bashkon,” u tha në fjalën e hapjes. Organizimi dhe misioni Festivali u realizua falë Shoqatës Hoteliere Turistike “Pro In”, Shoqatës Kulturore Artistike “Flaka e Llapit”, Komunës së Podujevës, Drejtorisë për Kulturë, Rini e Sport si dhe themeluesve Z. Xhevdet Hyseni e Z. Neni Balaj. Mesazhi i tyre ishte i qartë: ky edicion është vetëm një farë që u mboll sot dhe që do të lulëzojë në vitet e ardhshme, duke e kthyer Podujevën në qendër të një festivali që bashkon gjithë shqiptarët.
