Një kombinim i shkëlqyer i muzikës, poezisë, pikturës dhe skulpturës, me pjesëmarrjen e poetit të njohur ndërkombëtar Germain Droogenbroodt
Rikthehen Koncertet Poetike në Altea të Spanjës për vitin 2025. Ky aktivitet i rëndësishëm, i cili tërheq gjithnjë e më shumë një audiencë ndërkombëtare, organizohet nga Fondacioni Kulturor Ithaca, drejtuar nga Germain Droogenbroodt. I themeluar në vitin 2008 si një fondacion simotër spanjoll i shtëpisë botuese belge POINT Editions, e themeluar në vitin 1984, Fondacioni ka organizuar recitale shumëgjuhëshe të poezisë, shfaqje të shkëlqyera muzikore dhe ekspozita të pikturës nga artistë të shquar duke mbledhur rreth vetes plot artistë kombëtarë dhe ndërkombëtarë të interesuar për bashkëpunim. Fondacioni bashkëpunon me disa qendra kulturore dhe universitete, por Koncertet Poetike, të mbajtura çdo vit në selinë e fondacionit në Altea (Alicante), Spanjë, janë ngjarja e tij më e rëndësishme kulturore.
Koncerti i parë i edicionit të katërmbëdhjetë të Koncerteve Poetike do të mbahet më 3 gusht 2025 dhe, si gjithmonë, do të jetë një përvojë unike për dashamirësit e muzikës, poezisë dhe pikturës në një nga vendet më të bukura në Costa Blanca. Koncerti i parë, me pjesëmarrjen e pesë instrumenteve që do të luajnë kompozime nga Antonio Vivaldi dhe Luigi Boccherini, padyshim do ta magjepsë publikun. Poeti Germain Droogenbroodt do të recitojë disa nga poezitë e tij para një audience ndërkombëtare në pesë gjuhë, këtë herë të përzgjedhura nga libri i tij i fundit me poezi “Fragile Balance”(Ekuilibër i brishtë). Punimet artistike do të përfshijnë një ekspozitë skulpturash nga artisti i njohur Teo San José, i cili këtë vit po ekspozon veprat e tij në Indi dhe Tajvan.
\
Kuarteti përbëhet nga Raisa Ulumbekova, Renata Ulumbekova, Alberto Castillo dhe Yolanda Bueso Báidez. I pari nga të tre koncertet poetike gjatë mbrëmjes parashikohet të jetë një ngjarje e jashtëzakonshme që asnjë entuziast i muzikës, pikturës apo poezisë nuk do të dojë ta humbasë. Të ardhurat nga shitja e librave të Germain Droogenbroodt-it si dhe CD -ve të Vicent Ballester-it do t’u dhurohen organizatës “Mjekë pa Kufij” për viktimat e Gazës.