Kjo kuti e vogël e fjongo zbukuruar,
Si shumë vite, unë e hapa përsëri
Një foto, unë e ti, bebe përqafuar
Duartë e vogla, ndjeva ëmbël përsëri.
Dy pupa të vogla, nga unë punuar
Sa herë shtëpisë ecnim, plot gëzim
Sa herë për ty, netëve rrija zgjuar…
E sa herë të ngrohja, me trupin tim !
Unë, fëmijë isha, pothuaj edhe vetë
Dhe frigohesha të t’mbaja në duar,
E tek puthja të voglat doçka lehtë,
Universin, t’gjithë e kisha pushtuar !
Këngët kujtoj…ato këngë të bukura
Ninullat, deri sa gjumi të kish zënë
Ëndërrat e bardha, kthyer në flutura…
E belbëzimet e para, që ti ke thënë !
Je rritur bir, e malli shpesh më merr
Për bebën e vogël, që tundja në duar
Të voglat pupla, sa herë kutisë i nxjerrë…
Kujtoj se si jeta, sa shpejt ka vrapuar !
Lermë o bir, të t’përkëdhel ty përsëri
Ninullat, lermë t’i këndoj ndonjëherë
Për mua, do mbetesh ai i vogli fëmijë…
Sa herë të voglat pupla, kutisë do nxjerrë !