E bukur, si trëndafilat që shpërthejnë qershorit
e bardhë je si bora, kur malet fashon,
syte e mi i ngjajnë ditëve të dhjetorit,
nuk të prek unë, s’mundem, kur zemra gufon.
Çokollatë e ëmbël me puthjen në buzë,
se di sa po vuaj, shija më çliron,
je si shi behari, më lidh me tërkuzë,
ku po ma çon shpirtin, pse më torturon?
Ti je dashuria, sa shumë të kam pritur,
me aortën time, gjak të qarkulloj
në buzëqeshjen tënde sytë e mi kanë lindur,
çmenduri e ëmbël pa ty nuk jetoj.