Jo vetëm vëmendjen e mediave dhe të njerëzve, por këngët e interpretuara nga ikona shqiptare, Parashqevi Simaku po kapin shifra marramendëse.
Drejtori i Acromax Media, Aldor Nini në një intervistë zbulon se ka shumë palë të treta të cilët kanë postuar në Youtube këngët e performuara nga këngëtarja në fjalë, që kanë arritur të numërojnë deri në 100 milionë shikime.
Sipas drejtorit, të gjitha të drejtat e këngëve të Simakut, i takojnë RTSH-së, që është edhe entiteti i vetëm që mund t’i publikojë zyrtarisht këto materiale artistike.
“Youtube paguan për atë që prodhon videon dhe atë që prodhon audion. Këngëtarja në fjalë si interpretuese, të ardhurat duhet t’i marrë nga agjensitë kolektive. Nga Youtube ajo nuk mund të marrë asnjë të ardhur. Ka palë të treta që nuk kanë të drejta që e kanë marrë këngën dhe e kanë hedhur në Youtube. Të gjitha të drejtat e këngëve janë të RTSH-së. Ai është entiteti që mund t’i publikojë zyrtarisht. Pasi është pronar i pjesës vizuale dhe të audios. Janë disa këngë që janë hedhur. Ka video deri në 700 mijë klikime. Në total mund të jenë 100 milion klikime. Mund të jenë bërë diku te gjysmë milion deri në 1 milion euro me këngët e saj në total, që janë hedhur nga palë të treta”, deklaroi Aldor Nini.
Më tej Nini komentoi pak dhe rastin e Pirro Çakos, i cili u komentua shumë në rrjet pasi bllokoi disa nga kanalet që kishin publikuar këngën e Parashqevi Simakut me titullin “E duam lumturinë”, për ta publikuar në platformën e tij në Youtube.
Gjithashtu, autori thekson se dhe në raste të tilla, të drejtat e autorit i takojnë RTSH-së, e cila më pas mund të shpërndajë të gjitha të ardhurat te komponentët që kanë kontribuar për prodhimin e këtij materiali muzikor./Pamfleti