Instituti Kombëtar i Shëndetësisë Publike të Kosovës (IKSHPK), ka njoftuar se pas marrjes së mostrave në liqenin e Badovcit, rezultatet kanë qenë se 15 mostra nga numri total i mostrave të marra rezultojnë me tejkalim të standardit për Mangan, shkruan Gazeta Metro.
Sipas Udhëzimit Administrativ Nr: 10/2021 “Për cilësinë e ujit të destinuar për konsum nga njeriu”, norma e lejuar për Mangan në ujin për pije është 0.05 mg/L.
IKSHPK ka thënë se bazuar në të dhënat e deritashme, paraqitja e “fenomenit” te Manganit në Liqenin e Badovcit është dukuri e vazhdueshme, e cila ndodh kryesisht në kohën e ndrrimit të stinëve.
Duke pasur parasysh rezultatet e lartpërmendura, IKSHPK ka rekomanduar ndërkaq KRU “Prishtina” që:
• Të kontrollohet procesi i dezinfektimit në mënyrë që vlera e Cl rezidual të jetë 0.1-0.2mg/L, e cila garanton cilësinë e ujit në aspektin bakteriologjik dhe në të njëjtën kohë ndihmon në proceset oksido-reduktive;
• Të përcjellet ndotja organike (TOC) në ujin e liqenit dhe në rrjetin shpërndares;
• Zbatimi i procedurave standarde për situatën e krijuar në të gjitha fazat e trajtimit të ujit;
• Shpërlarja e rrjetit shpërndarës – gypave magjistral;
• Shpërlarja e rrjetit shpërndarës – segmenteve të vogla;
• Të sigurohet ujë higjienik për pije për qytetarët.
IKSHPK njofton se deri me datën 02.10.2024 në rezultatet e mostrave të marra sipas planit të Monitorimit për ujin e pijshëm, nuk ka pasur mostra që kanë rezultuar me vlera të shtuara të manganit mbi standardin e paraparë (0.05 mg/L) sipas Udhëzimit Administrativ Nr: 10/2021 “Për cilësinë e ujit të destinuar për konsum nga njeriu”.
Bashkëngjitur, harta me zonat që furnizohen nga Liqeni i Badovcit./gazetametro.net