Ika prej teje dhe
kur arrita këtu në këtë vend ku botë s’ka më,
sigurisht bëra festë.
Shkova në vinotekën më të shtrenjtë dhe
iu luta zotërisë, një verëshitës me sqimë,
të më jepte verën më të mirë, por
dhe të ma paketonte me klas…
E meritonte kjo ngjarje pak luks;
me kast.
I paduruar nxitova në banesën e re,
në dhomën me dritare nga e panjohura dhe
si, për në më të mirën festë,
gjithçkaje i dhashë atmosferën e duhur
të një lumturie pa cak,
me një ceremoni “par eksëlans”.
Së pari kurova tryezën: mbulesë,
piceta të qëndisura, qirinj, gota
të blera enkas për këtë rast, pastaj
u ula para gotës dhe i dhashë çastit frymë:
heshtjen, pritjen e duruar e solemne
që do një rast i tillë, ku muzikën
e nxjerrin tasta dhe gishta durimi
që kushedi se ku luajnë.
S’ka përfytyrim ta rrokë atë shfaqje
pa spektatorë, pa dëshmitarë, po qe se
s’llogaris sytë e tu, pas shpine,
vështrimin mbi krejt ç’po bëhej aty:
heqjen e kapuçit me ngjyrën e kuqe
nën dritën e mekur të qirinjve, vishnje e thellë –
lëvizjet e kujdesshme për nxjerrjen e tapës, në fund
kërcitja e saj si një trofe hakmarrëse.
Pastaj lëvizje të kujdesshme, të matura,
vetëm me qëllimin për të mos mbaruar,
si një torturë që e bën mbi një t’urryer.
Por duhet të ishe atje ta jetoje
shkëlqimin e gotës bosh në anën tjetër
e pastaj rrëshqitjen e ngadaltë nëpër qelq
të lëngut tinëzar me të kuqen e dehjes,
gjer u mbush me triumf.
Tënden e lashë përballë, në gjysmëhije
dhe ti dridheshe, luhateshe me flakë lutëse;
të zbutje hakmarrjen… Ta dish,
ngazëlleja.
Ta shihje kur e mora kupën!
E ngrita përballë dritës t’i shijoja ngjyrën,
e nuhata, mbylla sytë, mora frymë,
mbusha mushkëritë me amën e hakmarrjes;
Me shfrim dehës ngrita kupën e thashë:
“për harrimin!”
Pastaj e afrova në buzë,
n’atë që ti e kishe puthur e puthur pambarim
Dhe thitha pak, vetëm pak,
një rubë…
Më thuaj si…!? Po hë de si;
Si mund të ishe ti n’atë gotë, n’atë verë!?
Rrëshqite nëpër gjak, nëpër dej, nëpër trup,
më pushtove: më shtrive, më rrëzove,
më bëre falem, të përulem, të bie në gjunjë,
të lutem…
Më thuaj si…!? Po hë de si,
Si…!?