I vakët dielli i nëntorit
në mesditë na gënjen bujarisht,
rrezet mashtruese
na përkëdhelin me ngrohtësi
gjersa perëndimi i rrëmben hajnisht.
I dëshirueshëm
dielli i nëntorit,
e ndjekim,i afrohemi tinëzisht,
këtë diell që e refuzojmë
verës përvëluese,
besnik i njerëzimit ,
përjetësisht
Lutje
Ngjyer pendën mushtit të rrushit
iu luta vjeshtës të rrijë dhe pak,
mos t’ia lirojë vendin acarit,
se zemra e moshës pikon gjak.
Iu luta vjeshtës me zemër në dorë
mos ta heqë tapetin e artë,
mos t’i lërë pemët si kërcure,
ta refuzojë vellon e bardhë.
I dua ngjyrat,argëtim i syve,
esencë e shpirtit njerëzor,
porse pranverës ngjan më bukur,
mbi pemë veli i bardhë,nusëror.