Besim Arifi-NË KUJTIMIN TËND NANË

Një mëngjes si ky,
I ftohtë si dimri,
Ndiej hapat e tu të lehtë,
Ndiej aromën tënde prej misku,
Teksa vjen…
Dhe, pa e kuptuar, koha ikën,
Imazhi yt më humbet
Në mjegullën e shtrirë përtokë.
Sa larg je atje,
E sa afër je këtu, në shpirtin tim!
Sa herë fryn era,
E sa herë rigon shiu,
Unë kërkoj të gjej,
Atë fytyrë engjëllore,
Atë buzëqeshje tënden që shëronte çdo plagë.
Je kudo, me aromën tënde prej misku,
Pa ty gjithçka është e ftohtë…
Shumë e ftohtë.
Mirë që më erdhe në ëndërr, nanë!