Eja…
në një natë si kjo.
Ose,
më mirë,
prit edhe pak,
kur hija e territ
t’ia verbojë retinën
diskut të artë.
Eja…
nxito,
se syret kureshtare,
të hipnotizuar
në grafikë filmash,
rrëmbimin
do të shquajnë.
Eja pra…
kam gjithë ditën
që po të pres,
e veshur
me fustan të mëndafshtë.
Prej gjumit të Maleficent-it
kam kohë
që s’jam zgjuar.
Eja…
të lutem,
mos përto.
Veç Hëna kureshtare
të mos na shohë.