Eja më shpejtë ti natë e gjatë
Eja e errët pa yje pa hënë
Eja me vrap me bujë e me gjëmë
Sepse ka do kohë dita është lëngatë
Veli yt i zi mbulon llahtarinë
Qetëson përhumb gjithçka me magji
Zhurma zallahia shuhet në qetësi
Kërkon nganjëherë shpirti dhe heshtimë
Me pushtetin tënd krejt terr na mbulo
Me shkëlqim vrastar drita po na vret
Si një fluskë fluide lumnia u tret
Përballë mizorisë një zë thotë duro
Të jesh një gur diku në një bjeshkë
Më mirë do të qe do të ish një fat
Larg llumit njerëzor tretur diku larg
Diku i ngurosur pa ndjenja të jesh
Prandaj eja shpejt ti natë e gjatë
Eja krejt e errët pa yje në sfond
Eja me vrap dhe mbulo një komb
Se dritën s’e duron terrin e ka fat