Ky shi i butë, si ninullë e ëmbël
Xhamat e dritareve lëpin me delikatesë
Një ëndërr bredharake më mban peng në shtrat
E s`më le të zgjohem këtë mëngjes.
Nata e gjatë nuk i paska mjaftuar
Ca orë mëngjesit po kërkon t`ia vjedhë
Piklat e shiut lëpihen mbi xhama
Puthen delikatshëm me një gjethe të verdhë.
Ia njoh ngjyrat pemëve të oborrit
Ndaj po vras mendjen nga erdhi ky gjeth
Thua mysafir nga rrugë e largët?
Që trupin nën kuvertë ma pik e ma ngjeth?
Ky shi i butë si ninullë e ëmbël
Si adoleshent po më punon rreng
Jastëkut qëndisur fijesh të mëndafshta
Qerpikësh të mëndafshtë lotin më merr peng.