Një iso labe zbret ngadalë
(Diçka si prush apo si zjarr)
Një grup turistësh ndalin hapin
Dhe shtangen përmbi trotuar
Dëgjojnë turistët të hutuar
Dhe ndjejnë në gjoks një psherëtimë
Nga ç’gryka del kjo këngë-baladë
Nga del kështu kjo drithërimë?
Mos del nga portat e kalasë
Se s’mund ta mbajë dot brenda gjirit
Apo mos vallë kjo iso labe
Del nga naganti i Çerçizit?
Pastaj ca lebër qylfbardhë
Zbresin ngadalë, serbes-serbes
Si copa malesh me dëborë
Nga një rrufe lidhur në brez
Dhe ndizet isua në rrugica
Pastaj përhapet deri larg
Nga cilët shpirtra del kjo këngë
Si tetë violinë nën një hark?!
Shikojnë turistët të çuditur
Shtatë a tetë lebër mbledhur bashkë
Ç’të jetë kjo brengë e rëndë si malet
Sikur po klith një plagë e lashtë?!…
Një iso labe zbret ngadalë
(Diçka si prush apo si zjarr)
Një grup turistësh ndalin hapin
Dhe shtangen përmbi trotuar.