Shqipe Bytyqi-DY HAPA

Frymoj
për andrra
t’pabinduna
irreale për tjerët
Fatamorganë fatamorganë…
murmurisin, hijet e zeza rreth meje
e nisin e flasin për paqen
gojët, që lidhen e zgjidhen
pa vullnetin e tyne
pafytyrësisht thonë
veç një hap larg asht paqja
një firmosje mbi një letër
une, andej shoh
një hap copëtimesh
andërrthyemjesh
shtatë breza jetësh pritje
deri n’ardhje t’një Moisiu t’ri
për t’na kthye
mbase ku jemi sot
për mi ç’ba paqen gojëlidhun
identitetin dhe historinë e vjedhun
për mi nxjerr sarkofagët e mykun
ku prehet e vërteta
ajo e dlira
e pashkruemja
ku prehet andrra ime
dhe rreziku
i një thike pas shpinde