Ish-presidenti i Barcelonës, Josep Maria Bartomeu, ka zbuluar se klubi katalanas kishte marrë informacion për një ofertë të mundshme rekord për Lionel Messi.
Sipas tij, një klub i paidentifikuar ishte i gatshëm të paguante klauzolën e lirimit prej 400 milionë eurosh për yllin argjentinas në vitin 2017, menjëherë pas largimit të Neymar te Paris Saint-Germain për 222 milionë euro.
“Pas largimit të Neymarit në gusht 2017, morëm informacione se një klub tjetër po përgatitej të paguante klauzolën prej 400 milionë eurosh për Messin,” ka deklaruar Bartomeu për “AS”, raporton RTKLive.
Ai shtoi se drejtuesit e Barcelonës reaguan menjëherë për të siguruar të ardhmen e kapitenit.
“U ulëm me Leon dhe babanë e tij dhe propozuam rinovimin e kontratës me një klauzolë të re prej 700 milionë eurosh, e cila u nënshkrua në nëntor 2017”, tha ai.
Bartomeu theksoi se paga e re e Messit ishte e justifikuar plotësisht.
“Messi rinovoi me një pagë që për mua ishte shumë e arsyeshme, duke marrë parasysh kontributin e tij në dhe jashtë fushës”, theksoi ai.
Në fund, ai pranoi se klubi nuk donte të rrezikonte humbjen e yllit të tij kryesor.
“Nëse u paguan 222 milionë euro për Neymarin, atëherë mund të paguheshin edhe 400 milionë për Messin. Ne nuk donim ta humbnim në asnjë mënyrë”, përfundoi Bartomeu.