Barcelona me shumë vështirësi i ka fituar pikët e plota në udhëtim te Real Betisi, në kuadër të xhiros së 21-të në La Liga.
Katalunasit siguruan fitoren krejt në fund me rezultatin përfundimtar prej 2:4.
Barcelona e nisi për mrekulli duke dominuar në pjesën e parë në të gjitha aspektet.
Pas një aksioni të shpejtë, Pedri e gjeti për mrekulli Ferran Torres i cili kaloi mysafirët në epërsi (21’).
Robert Lewandowski realizoi gjithashtu por që u anulua nga VAR-i për pozitë jashtë loje.
Barcelona ishte prapë më e mirë edhe në pjesën e dytë, me Torres që realizoi golin e dytë pas një tjetër aksioni fantastik (48’).
Pastaj, vendasit disi u këndellen. Isco me një vollej të mrekullueshme e ngushtoi epërsinë (56’).
I njëjti vetëm tre minuta më vonë, pas harkimit të Luiz Henriques shënoi për ta barazuar rezultatin (59’).
Sidoqoftë, në minutat e fundit Barcelona realizoi edhe dy herë të tjera për ta vulosur fitoren.
Fillimisht, i inkuadruari Joao Felix riktheu epërsinë pas asistimit të Torres (90’).
Ndërsa, dy minuta më vonë Torres e kompletoi het-trikun me një parabolë të bukur (90+2’).
Barcelona tani renditet në pozitën e tretë me 44 pikë derisa Betisi qëndron në vendin e nëntë me 31 sosh.
