Liverpool ka shënuar fitore të rëndësishme 4-1 ndaj Newcastle United në “Anfield”, duke u rikthyer nga disavantazhi dhe duke regjistruar fitoren e parë në Premier League për vitin 2026.
Ky triumf i dha fund një serie prej pesë ndeshjesh pa fitore në elitën angleze.
Newcastle e nisi më mirë takimin dhe kaloi në epërsi pas një kundërsulmi të shpejtë, kur Anthony Gordon realizoi me këmbën e djathtë, duke shënuar golin e tij të parë nga loja e hapur në Ligën Premier pas më shumë se një viti.
Megjithatë, Liverpool reagoi fuqishëm para përfundimit të pjesës së parë, me Hugo Ekitike që realizoi dy gola brenda pak minutash. Fillimisht ai përfitoi nga asistimi i Florian Wirtz për të barazuar rezultatin, ndërsa më pas shënoi edhe golin e epërsisë me një finalizim të saktë, duke përmbysur rezultatin në favor të vendasve.
Në pjesën e dytë, Liverpool vazhdoi presionin dhe realizoi golin e tretë përmes Florian Wirtz, pas asistimit të Mohamed Salah. Me këtë asistim, Salah u bë lojtari i parë në historinë e Ligës Premier që shënon dhe asiston nga dhjetë herë kundër të njëjtit kundërshtar.
Fitorja u vulos në minutat e fundit, kur Ibrahima Konate shënoi golin e katërt pas një topi të mbetur në zonë, duke e mbyllur ndeshjen me rezultat bindës.
Me këtë sukses, Liverpool renditet në vendin e pestë me vetëm një pikë më pak se Chelsea në pozitën e katërt.
Në anën tjetër, Newcastle vazhdon serinë negative në transfertat ndaj Liverpoolit, duke mbetur pa fitore në 30 ndeshje radhazi në “Anfield”, dhe aktualisht pozicionohet në vendin e dhjetë në tabelë./Rtk/