Viti 2025 shënoi vitin e nëntë që nga pranimi i Kosovës në FIFA dhe UEFA, rrjedhimisht dhe pjesëmarrjes së kombëtares dardane në kualifikimet zyrtare për Kampionat Botëror dhe Kampionat Evropian.
Ky vit, ishte vit i plotësimit të ëndrrave dhe zhvillimit të hovshëm të Kosovës në arenën ndërkombëtare, me kombëtaren që ‘theu’ pothuajse çdo pengesë të mundshme, duke arritur sukses historik në skenat më të mëdha të futbollit.
Kombëtarja e Kosovës, fillimisht, e nisi vitin 2025 duke qenë në vendin e 97-të në ranglistën e FIFA-s, teksa e mbylli duke qenë në vendin e 80-të. Një rritje e madhe prej 17 vendesh, që shumë kombëtareve i duhen vite për ta bërë këtë.
E, kjo erdhi si pasojë e paraqitjeve të mëdha të “Dardanëve” në fushën e lojës.
Kosova e nisi me fitore vitin 2025, në ndeshjen ndaj Islandës në “play-offin” për ngjitje në Ligën B të Ligës së Kombeve. Të besuarit e Franco Fodës fituan 2-1 në “Fadil Vokrri” me 20 mars. Tri ditë më vonë, “Dardanët” fituan 3-1, duke siguruar një vend në Ligën B të Ligës së Kombeve.
Pas suksesit në këtë kompeticion, Kosova vazhdoi në qershor me dy miqësore, si përgatitje për ndeshjet e shtatorit që e prisnin Fodën dhe djelmoshat e tij.
Kosova fitoi 5-2 ndaj Armenisë dhe 4-2 ndaj Ishujve Komore, për të vazhduar vitin me fitore.
Mirëpo, pas “çdo të mirë, vjen një e keqe”, dhe Kosova u përballë ashpër me realitetin, në ndeshjen e parë të shtatorit.
Verdhekaltërit dardanë u mposhtën thellë në Bazel nga Zvicra, në ndeshjen e parë kualifikuese për Kampionatin Botëror të vitit 2026. Zvicra ia shënoi katër gola Kosovës, dhe atë të gjitha në pjesën e parë.
Megjithatë, shpirti dardan nuk dorëzohet asnjëherë, dhe kështu dëshmuan lojtarët e Kosovës në ndeshjen e ardhshme të atij muaji.
Kosova ia doli të fitojë 2-0 ndaj Suedisë, duke shkaktuar një befasi të madhe, e duke u rikthyer fuqishëm nga ajo humbje e dhimbshme dhe shkatërruese.
Rezultatet pozitive vazhduan edhe në muajin tetor për Fodën dhe kombëtaren kosovare.
Fillimisht, me 10 tetor, Kosova barazoi pa gola me Slloveninë në “Fadil Vokrri”, duke shënuar ndeshjen e dytë radhazi pa humbje, pavarësisht kërcënimeve të vazhdueshme të sllovenëve në drejtim të portës të Arijanet Muricit.
Paraqitje të madhe, mbrojtja dardane bëri në ndeshjen e ardhshme në Suedi.
Përveç që nuk pësuan gol, “Dardanët” rrezikuan disa herë portën suedeze në Goteborg, derisa ishte Fisnik Asllani që ia dhuroi fitoren Kosovës në udhëtim – ky gol dhe kjo fitore që i bënë shumë shqiptarë anë e mbanë botës të ëndërrojnë për një kualifikim direkt në Botëror ose në “play-off”.
Edhe ndeshjet e nëntorit ishin të jashtëzakonshme për Kosovën.
Kjo e fundit luajti prapë në terren mysafir, kur udhëtoi në Ljubjanë, ku fitoi 2-0 ndaj Sllovenisë, për të siguruar për herë të parë në histori “play-offin” e Botërorit.
Ndeshja e fundit e kualifikueseve qëlloi të jetë ajo ndaj Zvicrës, kundërshtarit që ia shkaktoi atë humbjen e rëndë në xhiron e parë – humbje që i kishte venitur shpresat për një kualifikim direkt në Botëror.
Kjo pasi në xhiron e fundit të kualifikueseve, Kosova dhe Zvicra kishin hyrë me një diferencë prej vetëm tri pikësh dhe pas rezultatit të ndeshjes së parë, Kosovës i duhej një fitore prej 5-0. Po të mos pësonin aq shumë gola në takimin në Bazel, ndoshta edhe mund të sigurohej vendi i parë, mirëpo kjo mbetet gjithmonë një “nëse…”.
Kosova e mbylli kampanjën kualifikuese me një barazim prej 1-1 me Zvicrën në Prishtinë, duke grumbulluar 11 pikë nga gjashtë ndeshje, teksa Zvicra ishte e para në grup me 14 pikë.
Kështu, “Dardanët” do të luajnë në “play-offin” e Botërorit në mars të vitit 2026.
Më 26 mars, Kosova do të udhëtojë në drejtim të Sllovakisë, për t’u përballur me këtë kombëtare në gjysmëfinalen e “play-offit” dhe në rast fitoreje, në finale do të luajë ndaj Turqisë ose Rumanisë, në Prishtinë.
Mirëpo, arritje të mëdha Kosova nuk pati vetëm në fushën e lojës.
Jashtë saj, Federata te Futbollit e Kosovës bëri disa lëvizje të suksesshme, që mund të shkruajnë historinë e kombëtares dardane përgjatë dekadës së ardhshme.
FFK-ja arriti t’ia rrëmbejë Zvicrës dy lojtarë: Leon Avdullahun dhe Albian Hajdarin, për të cilët zviceranët u shprehën shumë të zhgënjyer që i humbën/Gazeta Express/.