Kapiteni i Manchester United, Bruno Fernandes, ka folur hapur për super ofertat e refuzuara nga Arabia Saudite.
Portugezi zbuloi se verën e kaluar kishte refuzuar ofertat marramendëse nga Al-Hilal dhe Al-Ittihad për të qëndruar në “Old Trafford”.
Fernandes ishte shumë pranë një largimi, teksa Al-Hilal raportohej se ishte gati t’i ofronte portugezit një pagë prej 700 mijë paundësh në javë, çka do t’i sillte atij rreth 200 milionë euro për një kontratë trevjeçare.
Megjithatë, 31-vjeçari vendosi të qëndrojë te “Djajtë e Kuq”, duke i qëndruar besnik klubit pavarësisht periudhës së vështirë që Manchester United ka kaluar viteve të fundit.
“Mund të isha larguar siç bëjnë shumë njerëz dhe të thosha: ‘Dua të largohem, nuk dua të stërvitem, dua vetëm të iki për 20 ose 30 milionë euro, që të më paguajnë më shumë nga ana tjetër’. Por unë nuk e bëra kurrë këtë. Nuk u ndjeva kurrë në pozitë ta bëja, sepse empatia dhe dashuria që kisha për klubin ishin të njëjta”, tha Fernandes për ‘Canal 11’.
Ai shtoi gjithashtu se kishte ndjesinë që drejtuesit e klubit ishin të hapur për shitjen e tij.
“Por vjen një moment kur, për ta, paratë janë më të rëndësishme se çdo gjë tjetër. Klubi donte që unë të largohesha, këtë e kam të qartë në mendje. Ua thashë këtë edhe drejtuesve, por mendoj se nuk patën guximin ta merrnin atë vendim”, theksoi Fernandes.
Deklaratat e Fernandesit kanë nxitur reagime të shumta, duke nxjerrë në pah dilemat mes besnikërisë sportive dhe ofertave financiare marramendëse që vijnë nga Arabia Saudite./rtk/