Për dallim nga nëntë ditë më parë, kur Real Madrid shënoi fitore ndaj Atletico Madrid në vazhdime me rezultat 5:3 në Superkupën e Spanjës, kësaj radhe skuadra e Diego Simeones është hakmarrë ndaj asaj të Carlo Ancelottit, duke fituar 3:2 pas 120 minutave lojë.
90 minuta nuk ishin të mjaftueshëm sërish për të dhënë një fitues mes dy skuadrave të Madridit.
Atletico që ishte vendas në këtë takim, ishte në tre raste të ndryshme në epërsi prej një goli ndaj Mbretërve, ku në dy rastet e para rezultati u barazua, teksa goli i Griezmann në vazhdime nuk pati kundërpërgjigje.
Një gabim i tmerrshëm nga Rudiger, bëri që topi të shkonte te Samuel Lino, i cili shënoi golin e parë të takimit në minutën e 39-të, për 1:0.
Në minutat shtesë të pjesës së parë, Real Madridi u kthye në lojë, kur Jan Oblak pas një dalje të gabuar shënoi autogol, për 1:1, rezultat me të cilin u mbyll pjesa e parë.
12 minuta pasi filloi pjesa e dytë, Alvaro Morata u gjend në momentin e duhur, ku pas një devijimi të trefishtë të topit nga lojtarët e Real Madridit, shënoi në portën boshe për 2:1.
Mbretërit reaguan përsëri. Joselu që hyri në fushë në minutën e 81-të, shënoi 60 sekonda më vonë, i asistuar nga Bellingham, për të barazuar rezultatin në 2:2.
Deri në fund të 90 minutave nuk pati ndryshim dhe ndeshja shkoi në vazhdime.
Skuadra e Diego Simeones shënoi dy gola deri në fund të dy vazhdimeve, për të marrë fitoren e madhe.
Ishte fillimisht Griezmann që në minutën e 100-të shënoi gol fantastik pas një solo-akisoni, për ta çuar skuadrën e tij për herë të tretë në epërsi në këtë takim.
Ndërsa për rezultatin përfundimtar 4:2 shënoi Riquelme në minutën e fundit të vazhdimeve, pas një kundërsulmi të shpejtë.
Kështu, Atletico Madrid me fitoren e sotme e eliminon Real Madridin nga Kupa e Mbretit dhe vazhdon rrugëtimin e saj në çerekfinale, duke plotësuar numrin prej tetë skuadrave.