Një hetim i madh mbi baste të paligjshme në futbollin turk ka çuar në arrestimin e dhjetra personave, përfshirë lojtarë, gjyqtarë dhe zyrtarë klubi.
Mes të arrestuarve janë mesfushori i Fenerbahçes, Mert Hakan Yandaş, dhe mbrojtësi i Galatasarajit, Metehan Baltaci. Ndër të tjerët, në pranga ka përfunduar ish-gjyqtari dhe komentatori i njohur Ahmet Cakar, si dhe gjyqtari aktual Zorbay Kucuk, rapotojnë mediat turke.
Hetimi filloi në tetor ndaj mbi 150 gjyqtarëve për dyshime për baste në ndeshje, por shpejt u zgjerua duke përfshirë edhe lojtarë dhe zyrtarë të tjerë. Deri tani, prokuroria ka lëshuar urdhër-arreste për 46 të dyshuar, 35 prej të cilëve janë arrestuar, duke përfshirë edhe disa presidentë klubesh.
Ky skandal ka shkaktuar tronditje të madhe në futbollin turk dhe po ndiqet me kujdes nga media dhe tifozët./Rtk/