Lindon Emërllahu dhe Meriton Korenica, dy yjet e Kosovës te skuadra e Clujit, po kalojnë një sezon të shkëlqyer, duke u bërë pjesë kyçe e ekipit rumun.
Forma e jashtëzakonshme e dy futbollistëve ka tërhequr vëmendjen e klubeve ndërkombëtare, dhe sipas mediumit rumun ProSport, një nga klubet që po shfaq interes për ta është DC United, ekipi nga MLS në SHBA.
Raportimet thonë se vëmendja e klubit amerikan është e fokusuar kryesisht te Meriton Korenica, i cili ka impresionuar me aftësitë e tij teknike dhe fizike, shkruan Gazeta Express.
Sipas ProSport, DC United është duke e shqyrtuar mundësinë për të transferuar 28-vjeçarin gjatë afatit kalimtar të dimrit, duke e konsideruar si një opsion të fortë për të përforcuar mesfushën e ekipit.
Korenica, që iu bashkua Clujit në verën e vitit të kaluar, ka pasur një ndikim të jashtëzakonshëm këtë sezon, duke realizuar gjashtë gola dhe dhuruar shtatë asistime në 24 ndeshje në të gjitha kompeticionet.
Nëse DC United vendos të bëjë një ofertë për Korenicën, Cluji pritet të përfitojë një shumë të konsiderueshme financiare, duke marrë parasysh rëndësinë e mesfushorit kosovar për ekipin dhe ndikimin që ka pasur në sukseset e tij.
Nga ana tjetër, pronari i Clujit, Nelutu Varga, ka reaguar duke thënë se nuk është informuar për ndonjë ofertë konkrete nga DC United.
Ai theksoi se ndodhet aktualisht në Dubai dhe nuk ka marrë asnjë informacion në lidhje me këtë çështje.
Interesimi i DC United vjen në një moment kur të dy lojtarët kosovarë, Korenica dhe Emërllahu, po kalojnë në formë të shkëlqyer dhe janë në qendër të vëmendjes së skautëve të klubeve nga jashtë Evropës. E ardhmja e tyre mund të jetë drejt një aventurë të re në MLS, nëse negociatat vazhdojnë me sukses/Gazeta Express/