Pas ndeshjeve kualifikuese të kombëtarëve, rendi i erdhi njërit prej derbive më të mëdha të botës së futbollit, të njohur si “della Madonnina”.
“San Siro” do të jetë arena ku do të ballafaqohen mes vete Inter dhe Milan me fillim nga ora 20:45, në kuadër të xhiros së 12-të të Serie A.
Pas 11 ndeshjesh, “Zikaltërit”, e kryesojnë tabelën me 24 pikë, derisa “Rossonerët” ndodhen në vendin e tretë me dy pikë më pak.
Rivaliteti mes dy skuadrave nga qyteti i Milanos, ka nisur qysh në vitin 1908, “Kuqezinjtë” e fituan ndeshjen e parë me rezultat 2:1, e cila u zhvillua në Chiasso të Zvicrës.
Derisa në vitin 2001, u regjistrua edhe fitorja më e thellë në histori të derbit, ku Milan e mposhti Interin me rezultat 6:0.
Aktualisht dyja skuadrat, si ajo e Christian Chivus por edhe Massimiliano Allegrit, janë në formë të mirë dhe kjo premton një ndeshje tejet të fortë.
Interi ka fituar 11 nga 12 ndeshjet e fundit në të gjitha garat, ndërsa Milani është i pamposhtur në pesë sfidat e fundit kundër Interit dhe në dhjetë ndeshjet e fundit të Serie A.
Në të gjitha garat, Interi ka shënuar 341 gola në derbi kundër Milanit, 19 më shumë se “rossonerët”.
Në histori, mes dy skuadrave janë zhvilluar 228 ndeshje. “Nerazurrët” kryesojnë me 85 fitore, Milani ka 74, ndërsa 69 takime kanë përfunduar pa fitues../ klan kosova.tv