Nga Lulzime Malaj – poete, shkrimtare, piktore dhe autore e teksteve të këngëve
Dje, në ambientet e “Fine Art Gallery” u hap ekspozita, e organizuar nga Shoqata “Laskarina Bubulina” – “Gratë e Detarëve Shqiptarë – GDSH” në Vlorë, e cila përfundoi me sukses, ku pata nderin të jem pjesë me pikturat e mia. Ngjarja u nderua nga personalitete të artit, kulturës, piktorë, aktorë, shkrimtarë, poetë, profesorë, dhe qytetarë të nderuar të Vlorës. Na nderoi me praninë e saj Drejtoresha e Qendrës Kulturore, Znj. Anxhela Kapllani dhe Kuratorja e Galerisë, Znj. Era Xhebro duke i falenderuar nga zemra për përkushtimin, vlerësimin dhe kohën. Fjalën e rastit e mbajti Kryetarja e Shoqatës, Znj. Vjollca Aliaj. Më poshtë, ndjej të ndaj me ju fjalën time në hapjen e ekspozitës: Të nderuar miq, faleminderit që jeni këtu sot për të ndarë me ne këtë udhëtim artistik. Arti i pikturës është një gjuhë universale, një dialog intim mes shpirtit dhe ngjyrave, ku çdo vijë dhe ngjyrë çel një histori të veçantë. Piktura është një udhëtim i brendshëm, ku kërkojmë të kapim momentet më të heshtura dhe magjike të jetës. Në penelimin e parë mbi telajo ndjej një dozë pasigurie, ashtu si momenti kur çdo vendim ka peshën e tij, por në të njëjtën kohë lind magjia e krijimit. Në këtë parafrazim, shpesh më kujtohen fjalët e të Madhit Wagner që thoshte: “Kur ulem të kompozoj, jam gati të qaj”. Pra, arti është kjo ndjesi; një sfidë dhe dhunti bashkë, për të shprehur atë që fjalët shpesh nuk mund ta përshkruajnë. Ju faleminderit që ndani këtë moment me ne. Një përgëzim i veçantë për Znj. Vjollca Aliaj për angazhimin dhe organizimin dinjitoz në këtë ngjarje të bukur. Falenderoj Maestro Roland Runaj, artistin me zemër të madhe, për mbështetjen e tij të pakursyer dhe dashamirësinë! Një falenderim për Kela Pipin, që na ofroi ambjentin e saj artistik, për arredimi e ambjentit, punën e palodhur dhe mbështetjen, një artiste e vërtetë, fisnike. Faleminderit të gjithëve!
