Veprimtaria letrare e Murtez Asllanit tashmë ka marrë përmasa më të mëdha, meqë deri në ditët e sotme ka publikuar më se nëntë vepra të zhanreve të ndryshme (poezi, monografi dhe panorama – përmbledhje të fëmijëve krijues letrarë – nxënësve me të cilët bashkëpunoi vite e vite me radhë) vepra këto që u publikuan që nga viti 2013 – 2025. Vepra “PSE ANKOHET SHIU” (përmbledhje e më se 93 poezive) e Murtez Asllanit, pasuron opusin letrar të këtij autori, i cili shpreh aftësitë dhe cilësitë e tij përmes vargjeve poetike, të cilat lexuesin e bëjnë për vete, meqë mbi të gjitha shprehin dashuri të sinqertë në mes të njerëzve, të moshave dhe të gjinive të ndryshme. Përmbledhja e poezive “PSE ANKOHET SHIU” e Murtez Asllanit, në vazhdimësi të veprave paraprake shton edhe një hallkë më shumë në kolanën e veprave të këtij autori, që tashmë dekada me radhë është jo vetëm i pranishëm po edhe i pëlqyer nga lexuesit e vëmendshëm, jo vetëm në Kosovë po edhe më gjerë, gjithandej trojeve tona shqiptare. Vepra letrare “PSE ANKOHET SHIU”, po sikur edhe disa vepra të tjera paraprake të autorit, edhe pse kanë një larmi temash a motivesh të ndryshme, megjithatë ato gërshetojnë strukturimin e vargjeve (strofave), ndonëse nuk ka një strukturim ndarës nëpër cikle. Këtë mbarështim autori (Murtez Asllani) e ka bërë, në këtë mënyrë, ashtu siç i kanë ardhur frymëzimit, në kontekst jo të temave a motiveve, por në atë të kohës a rrethanave, d.m.th., ashtu siç ka rrjedhur vetvetiu procesi i jetës, ku autori vetëm i ka shenjuar si dukuri për të lënë gjurmë. Me fjalë të tjera autori, Murtez Asllani, qëllimisht lexuesin e shoqëron në shtegtim që nga poezia e parë “NË PIKNIK” deri te poezia e fundit e kësaj përmbledhjeje “PRANVERA E TRËNDAFILAVE MAGJEPSËS”, me një piknik poetik sa tërheqës a domethënës po edhe me vlera të shumëfishta. Vepra letrare “PSE ANKOHET SHIU” e Murtez Asllanit, po ashtu sikurse edhe disa nga veprat e po këtij autori, mbarështon një kolorit të begatë vlerash, ku lajtmotivi i të gjithëve është kultivimi i dashurisë në mes të njerëzve, në radhë të parë në gjirin familjar e pastaj si kurorëzim me atë kombëtar e atdhetar, ku fill e mbarim është aspekti njerëzor. Pra, autori vë në pah si dashurinë e dy vetave (prindërve) ndaj pasardhësve të tyre, atë në gjirin familjar, farefisnor, e më gjerë, deri në atë gjithëpërfshirës kombëtar e atdhetar. Kështu nga poezitë e kësaj përmbledhjeje venerojmë vargje emblematike për nënën, babain, vëllain, motrën gruan, djalin, vajzën, kushëririn, mësuesin, plakun, plakën, të varfërin, jetimin etj., etj. Në vazhdimësi të temës së dashurisë ndaj vendit (Kosovës – Shqipërisë) në këtë përmbledhje poetike janë mbarështuar disa poezi atdhedashurie, ku dominojnë figurat më emblematike të kombit si: Skënderbeu, Ismail Qemali, Adem Jashari si dhe disa nga heronjtë e dëshmorët e UÇK-së në përgjithësi e në veçanti të trevës së Shtimes e Ferizajt, të cilët shumë sish i ka njohur autori. Vepra “PSE ANKOHET SHIU” e Murtez Asllanit ia vlen të lexohet për disa arsye, e para është se autori duke qenë për një kohë (mbi katër dekada) mësimdhënës, di se çfarë t`i ofrojë lexuesit, duke e shoqëruar atë fill e mbarim me shumëçka nga jeta e përditshme jona, me të gjitha ato batica e zbatica të saj; e dyta me aftësinë dhe cilësinë e një krijuesi, autori di t`i mbarështojë fenomenet a dukuritë që e karakterizojnë njeriun tonë me virtyte të larta dhe e treta, Murtez Asllani fill e mbarim në këtë përmbledhje poetike nxjerr në pah idealin njerëzor – diademë e gjithë njerëzimit – njerëzores si tek ne e kudo tjetër në botë.
Sabit JAHA.