Mesazhi i ambasadorit të Shteteve të Bashkuara të Amerikës në Beograd, Christopher Hill, drejtuar presidentit serb Aleksandër Vuçiq për miratimin e shitjes së raketave “Javelin” në Kosovë, është në fakt një imperativ që ata të mendojnë mirë përpara se të angazhohen në veprime që mund të përshkallëzojnë tensionet.
Kështu tha Leon Hartwell, bashkëpunëtor i lartë në Qendrën për Analizën e Politikave Evropiane (CEPA) në Uashington dhe organizatën IDEAS në Shkollën e Ekonomisë dhe Shkencave Politike në Londër.
Ai për Zërin e Amerikës në gjuhën serbe shtoi se blerja e raketave Javelin është një mënyrë kyçe dekurajuese, si një sinjal i një reagimi të fortë ndaj të gjitha provokimeve të mundshme nga regjimi i Vuçiqit, transmeton gazeta online Reporteri.net.
“Pas tensioneve të iniciuara nga Vuçiq që nga shtatori i vitit 2021, të shënuara me vendosjen e shpeshtë të ushtrisë, duke përfshirë tanket që ajo mori nga Rusia në kufirin e Kosovës, kjo lëvizje strategjike thekson përkushtimin e Amerikës për të forcuar pozitën mbrojtëse të Kosovës. Njoftimi i shitjes së raketave “Javelin” gjatë takimit me presidentin Vuçiq, njeriun e parë të vendit fqinj, shërben si një tregues i pagabueshëm se Amerika është e gatshme të forcojë aftësitë mbrojtëse afatgjatë të Kosovës, si dhe aftësinë e saj për të mbrojtur sovranitetin dhe integritetin territorial.
Roli i Vuçiqit në mbështetjen e aktiviteteve si sulmi terrorist në Banjskë është shkak për shqetësim, veçanërisht pasi ajo që ai po bën përkon me tendencat e tij gjithnjë e më autoritare. Kur shikon se çfarë bëri për të çuar në përshkallëzimin në Kosovë, duket sikur ishte një strategji e qëllimshme për të destabilizuar fqinjët, për të larguar vëmendjen nga problemet e brendshme. Blerja e “Javelin” përfaqëson një mënyrë kyçe dekurajuese, si një sinjal i një reagimi të mprehtë ndaj të gjitha provokimeve të mundshme të regjimit të Vuçiqit. Në këtë kontekst, është e mundur që mesazhi i ambasadorit Hill për Vuçiqin të jetë në fakt një imperativ për t’u menduar mirë përpara se të angazhoheni në veprime që mund të përshkallëzojnë tensionet. Prandaj, “Javelin” është një hap fillestar për të penguar çdo manovër të nxituar të regjimit të Vuçiqit dhe shërben si një kujtesë diplomatike e pasojave të sjelljes së pamatur”, tha ai.
Gjatë javës së kaluar, Departamenti amerikan i Shtetit, në një përgjigje për Gazetën Online Reporteri.net, konfirmoi se Kosova ka bërë kërkesë për blerjen e raketave “Javelin” në vlerë prej 75 milionë dollarësh.
Në përgjigjen e DASH-it u theksua mbështetja për Forcën e Sigurisë së Kosovës.
“Departamenti amerikan i Shtetit shpesh ka vendosur të miratojë shitjen e huaja ushtarake për Ministrinë e Mbrojtjes së Kosovës, për përdorimin e armëve nga Forcat e Sigurisë së Kosovës”, tha DASH-i.
DASH-i po ashtu tha për Gazetën Online Reporteri.net se më 11 janar administrata amerikane ka njoftuar Kongresin për propozimin e programit për Shitjet e Huaja Ushtarake (FMS) për rastin e shitjes së raketave Javelin dhe pajisjeve të tjera të lidhura me to për Kosovën.
Sipas DASH-it, shitja e këtyre armëve mbështet “politikën e jashtme dhe objektivat e sigurisë kombëtare të SHBA-së duke përmirësuar sigurinë e Kosovës dhe zhvillimin e aftësive të saj mbrojtëse, të ndërveprueshme me NATO-n, pa ndryshuar ekuilibrin thelbësor ushtarak në rajon ose pa ndikuar në gatishmërinë mbrojtëse të SHBA-së”.
“SHBA-ja vazhdon të mbështesë Kosovën në transformimin transparent të Forcës së Sigurisë së Kosovës në një forcë shumetnike për mbrojtje territoriale, të ndërveprueshme me NATO-n që i nënshtrohet mbikëqyrjes civile”,u tha në përgjigjen e DASH-it për Reporteri.net.