Një banesë është përfshirë nga flaket mëngjesin e sotëm në fshatin Kodhel të Lezhës dhe fatmirësisht vetëm me dëme materiale. Në momentin që ka rënë zjarri në banesë ndodheshin 4 persona, ndërsa kryefamiljari, Landi Marku, kishte dalë për punë.
Gjithçka që ishte brenda është djegur, ndërsa dyshohet se shkak ka qenë një shkëndije elektrike. Zjarri është parë nga djali i madh që ka zgjuar nënën dhe dy motrat dhe kanë dale menjëherë. Vetëm pak djegie ka pësuar djali i shtëpisë ndërsa nxirrte më të vegjlit, por fatmirësisht vetëm me djegie të vogla.
Zjarri ishte në tavan, më ka kapur. Vonoi pak zjarrfikësja”, tha i riu.
Zjarrfikësit që mbërritën në vendngjarje shuan plotësisht flakët, por pa mundur dot të shpëtojnë asgjë që ndodhej brenda banesës. I zoti i shtëpisë ka thënë se tashmë i kanë mbetur vetëm muret e shtëpisë dhe se gjithçka është shkrumbuar duke kërkuar edhe ndihmë për të përballuar këtë situatë dhe të ftohtit e këtyre ditëve.
“Kam shkuar në punë si përditë, e kam lënë familjen në gjumë. Kur ka pa djali flakën i ka bërë zë motrës dhe së ëmës që të dalin. Djali ka hapur dyert dhe ka dalë direkt përjashta. Vetëm muret kanë mbetur. Unë kërkoj me më ndihmue se shiko, jam vetëm të dal në plastmas, nuk ka mbetur asgjë”, tha Landi Marku, i zoti i shtëpisë.