Marcus Rashford shpreson të rifillojë karrierën e tij te Barcelona pas një paraqitjeje fituese në ndeshjen hapëse të Ligës së Kampionëve 2025/26.
Dy gola nga Rashford i siguruan Barçës fitoren 2-1 ndaj Newcastle United në “St James’ Park”, teksa ylli i huazuar i Manchester United shënoi dy gola në pjesën e dytë për t’i siguruar të tre pikët ekipit të Hansi Flick.
Kjo paraqitje e Rashford i dha fund pritjes së tij për një gol pas një transferimi gjatë verës nga Old Trafford dhe reprezentuesi anglez ishte në ekstazë në fund të ndeshjes.
“Me goditjen me kokë, e sulmova hapësirën pak më herët sepse e gjeta atë hapësirë në zonën e Newcastle dhe aty më pëlqen të sulmoj. U përqendrova vetëm në mbajtjen e topit poshtë. Goditja me kokë është më e vështirë për mua”, ka thënë fillimisht Rashford.
“Me të dytin, kam shënuar më shumë nga këto lloj golash dhe shpresoj të shënoj edhe disa të tjerë”.
“Ka të bëjë me të qenit i sigurt, të gjuash dhe të guxosh kur je përpara portës. Të shënosh një nga këto gola në këtë lloj ndeshjeje është perfekte”.
Rashford gjithashtu pretendoi se po fillon të përshtatet me mjedisin e tij të ri në Kataluni dhe i bëri thirrje klubit të aktivizojë klauzolën e lirimit prej 35 milionë eurosh në fund të sezonit.
“Dua të qëndroj këtu për sa më shumë vite të jetë e mundur. Do të shohim nëse mund ta arrij këtë. Thjesht duhet të përqendrohem në përpjekjen për të bërë punën time dhe për të ndihmuar ekipin në çdo mënyrë që mundem”.
Sonte ishte një rezultat shumë i mirë, por duhet ta bëjmë përsëri këtë fundjavë”.
“Ndjej se kam besimin e Flick. E dija që ai ishte një trajner i shkëlqyer para se të vinte këtu, por të punosh me të është një kënaqësi. Shpresoj që kjo marrëdhënie e mirë të vazhdojë gjatë gjithë sezonit”, përfundoi anglezi.
Ndeshja e radhës për Barcelonën është një ndeshje në shtëpi në La Liga kundër Getafes më 21 shtator në stadiumin e përkohshëm Estadi Johan Cruyff./Demokracia.com/