Presidenti i SHBA-së, Donald Trump, ka mohuar kategorikisht zërat që qarkulluan gjatë fundjavës në rrjetet sociale rreth vdekjes së tij, duke i quajtur ato thashetheme absurde dhe konspirative.
Gjatë një deklarate për mediat të martën, Trump u shpreh se nuk kishte dijeni për këto spekulime dhe se fundjava e Ditës së Punës e kishte gjetur shumë aktiv.
Jo, në fakt kam qenë shumë aktiv gjatë fundjavës. Nuk dëgjova diçka kaq serioze”, tha Trump, në daljen e tij të parë publike pas disa ditësh mungesë.
Ai pranoi se kishte dëgjuar disa shqetësime të përgjithshme për mirëqenien e tij, por jo për lajme që sugjeronin se kishte ndërruar jetë.
“E dija që po thoshin: ‘A është mirë? Si ndihet? Çfarë nuk shkon?’”, shtoi ai.
Trump tha se gjatë fundjavës ka qenë çdo ditë në fushën e tij të golfit në Virxhinia dhe kishte dhënë një intervistë për “Daily Caller”. Sipas tij, angazhimet e fundit publike dëshmojnë për shëndetin e tij të mirë dhe energjinë në vijimësi.
“Isha shumë aktiv këtë Ditë të Punës. E kisha dëgjuar që qarkullonin disa zëra, por nuk e mora seriozisht”, theksoi ai.
Gjithashtu, Trump përmendi mbledhjet dhe konferencat që kishte zhvilluar javën e kaluar, duke nënvizuar një takim kabineti që zgjati më shumë se tre orë.
“Pastaj nuk bëra asnjë dalje për dy ditë dhe ata menjëherë thanë: ‘Duhet të ketë ndodhur diçka’. Biden nuk i bën këto për muaj të tërë”, tha presidenti me ironi./EURONEWS.AL/