Milani ka arritur një fitore të bukur në miqësoren e dytë të turit aziatik, duke mposhtur 4-2 kampionët e Anglisë, Liverpool, në një sfidë të zhvilluar në stadiumin “Kai Tak Sports Park”, në Hong Kong.
Skuadra e Massimiliano Allegrit u udhëhoq nga një Rafael Leao fantastik, i vendosur sërish si sulmues i parë, një ide taktike që po jep fryte. Pikërisht ai hapi serinë e golave në minutën e 10-të, pas një kundërsulmi të shpejtë dhe asistimi të Pulisic. Megjithatë, anglezët barazuan në minutën e 26-të me një gol spektakolar të Szoboszlai-t, që goditi saktë nën traun e portës.
Pas pushimit, kur Liverpool-i ndryshoi thuajse të gjithë formacionin duke nxjerrë ‘yje’ si Salah, Alisson, Van Dijk, Robertson, Wirtz dhe vetë Szoboszlai, Milani reagoi menjëherë. Loftus-Cheek shënoi golin e dytë në minutën e 52-të pas një aksioni të shpejtë që nisi nga Leao. Vetëm tetë minuta më vonë, Okafor realizoi golin e tretë për kuqezinjtë me një goditje të saktë pas një pasimi të Saelemaekers.
Në minutën e 93-të, Gakpo rihapi ndeshjen për Liverpool-in me një gol me kokë, por një minutë më pas, Okafor shënoi edhe golin e tij të dytë personal dhe vulosi fitoren 4-2, duke përfituar nga një gabim i mbrojtjes kundërshtare në ndërtimin e lojës.
Një test shumë pozitiv për Milanin, që po përfiton nga qartësia taktike e Allegrit dhe forma e mirë e lojtarëve kryesorë. Ndeshja ndaj Liverpool-it është një injeksion i fortë besimi përpara sfidës së parë zyrtare të sezonit: ndeshja e Kupës së Italisë ndaj Barit./Syri Net/