Yjet e Inter Miamit, Lionel Messi dhe Jordi Alba, janë pezulluar me nga një ndeshje nga Major League Soccer (MLS) për mungesën e tyre të paarsyeshme në All-Star Game, duke i përjashtuar kështu nga përballja e së shtunës më 26 korrik 2025 ndaj FC Cincinnati.
“Jordi Alba dhe Lionel Messi nuk do të jenë të disponueshëm për ndeshjen e radhës të klubit të tyre ndaj FC Cincinnati për shkak të mungesës së tyre në All-Star Game të MLS këtë javë,” njoftoi liga të premten, duke cituar rregullat që e bëjnë një lojtar të papërshtatshëm për ndeshjen pasuese të klubit nëse mungon në All-Star Game pa aprovimin paraprak të ligës.
Dy lojtarët pritej të përfaqësonin MLS-në përballë një përzgjedhjeje të Liga MX, në Austin të Teksasit të mërkurën, por u hoqën papritur nga formacioni vetëm disa orë para ndeshjes, raporton Telegrafi, transmeton Periskopi.
Trajneri i Inter Miamit, Javier Mascherano, sqaroi në një konferencë për shtyp se të dy lojtarët kishin munguar gjatë gjithë javës në stërvitjet grupore për shkak të lodhjes.
“Pjesë e planit ishte që si Messi ashtu edhe Jordi të bashkoheshin me grupin vetëm sot. Ata nuk janë stërvitur me skuadrën gjatë gjithë javës”, tha Mascherano, duke shtuar se Messi po vuan nga një “lodhje normale, për shkak të numrit të madh të ndeshjeve dhe minutave të luajtura.”
Mascherano kritikoi gjithashtu ngarkesën e kalendarit të MLS-së, duke i bërë thirrje ligës që të ndërpresë përkohësisht kampionatin gjatë zhvillimit të All-Star Game në të ardhmen.
“Nëse duan të organizojnë evente të tilla, atëherë nuk duhet të ketë ndeshje të kampionatit atë javë. Nuk mund të mbahet një ndeshje All-Star gjatë javës me këtë ritëm që kemi – është çmenduri”, përfundoi ai./Periskopi/