I putha duart e vogla të nënës
Një mëngjes të trëndafilët, gushti.
Për herë të parë, puthja më dhembi.
E putha ballin e rrudhur të babait
Po atë mëngjes të mbushur me mall,
Në poret e shpirtit puthja fluturoi.
Sa mund e djersë kanë zvogëluar ato duar,
Sa përkushtim e sakrificë në çdo rrudhë.
Sa dashuri e paputhur, në një puthje,
Dashuri vajze, një mëngjes gushti.
Në ikje për të ngritur një tjetër fole,
Në sendukun e pajës: edhe dy puthje.
Më përkëdhelin shpirtin larg atdheut,
E shkurtojnë kohën e vajtje-ardhjeve.