Shqipëria është shpallur si destinacioni më i mirë për pushime verore në Evropë për vitin 2025, sipas ekspertëve të udhëtimeve dhe një artikulli të botuar së fundmi në të përditshmen britanike “Daily Express”.
Me një kombinim perfekt të bukurive natyrore, çmimeve të përballueshme dhe mikpritjes së ngrohtë, vendi ynë po tërheq gjithnjë e më shumë vëmendjen e turistëve ndërkombëtarë.
Blogeri i njohur i udhëtimeve, Kieran Brown, e ka quajtur Shqipërinë një nga destinacionet “parajsë” të Evropës, duke theksuar se është një alternativë shumë më ekonomike krahasuar me vende si Greqia, Italia apo Kroacia. Sipas tij, Shqipëria ofron pushime me çmime që e bëjnë atë të krahasueshme me “Maldivet e Evropës” ku një gotë birrë kushton vetëm 1,10 paund dhe mund të gjenden akomodime për 25 paund nata.
Një nga perlat e vërteta sipas tij është Ksamili, vendpushimi që çdo vit e më shumë fiton zemrat e vizitorëve me ujërat e kristalta, baret buzë plazhit, jetën e gjallë të natës dhe perëndimet e diellit që mbeten në kujtesë.
Me një temperaturë mesatare prej 28°C nga maji në shtator, Ksamil ofron gjithçka që një turist kërkon për një verë të paharrueshme.
“Pasi kam vizituar mbi 100 vende, Shqipëria është padyshim një nga të preferuarat e mia,” u shpreh blogeri Brown, duke sugjeruar që udhëtarët të fillojnë nga kryeqyteti, Tirana, dhe të vazhdojnë drejt Rivierës Shqiptare për të parë këtë perlë ende të pazbuluar plotësisht nga turizmi masiv./Rtk live/