Trajneri i Napolit, Antonio Conte, ka folur me entuziazëm për përforcimin më të madh të skuadrës së tij këtë verë, mesfushorin belg Kevin De Bruyne.
“Ai vjen tek ne për të marrë një sfidë të re, edhe për të është një situatë ndryshe: ai ka arritur nivele shumë të larta në karrierën e tij dhe ka ende shumë për t’i dhënë futbollit”, ka deklaruar Conte.
Belgu, i cili konsiderohet si një nga mesfushorët më të mirë në historinë e Premier League, ka fituar nëntëmbëdhjetë trofe me Manchester City që nga transferimi i tij nga Wolfsburg në vitin 2015, përfshirë gjashtë tituj të Premier League dhe një trofe të Champions League. Ai pritet të sjellë eksperiencë dhe cilësi në mesfushën e Napoli, që këtë sezon synon të mbrojë titullin.
Krahas De Bruyne, Napoli është përforcuar edhe me anësorin holandez Noa Lang dhe qendërmbrojtësin italian Luca Marianucci.
Conte ka kërkuar që ekipi të mbetet i përulur dhe i fokusuar.
“Ata që kanë ‘Scudetton’ në fanellë janë favoritë ose ndër favoritët. Nuk duhet të ikim ose të fshihemi nga frika”, ka thënë trajneri italian. “Kemi punuar shumë për ta përshtatur skuadrën. Është e pashmangshme që ky sezon të jetë shumë sfidues”.
Conte ka theksuar se dështimi i Napolit në sezonin 2023/24, kur si kampion në fuqi përfunduan në vendin e dhjetë pas largimit të Spalletti dhe ndryshimeve të shumta të trajnerëve, duhet të shërbejë si mësim./Rtk live/