Autoritetet tajlandeze kanë arrestuar një 35-vjeçare e akuzuar për shantazh ndaj 13 murgjve, pasi i filmoi gjatë marrëdhënieve seksuale dhe më pas i kërcënoi për t’i publikuar pamjet.
Wilawan Emsawat, e njohur me pseudonimin “Sika Golf”, dyshohet se ka përfituar mbi 10 milionë euro përmes këtij skandali që ka tronditur komunitetin budist në vend. Ajo përballet gjithashtu me akuza për pastrim parash dhe përfshirje në lojëra të fatit online.
Gjatë kontrollit, policia sekuestroi pesë telefona celularë, ku gjeti video dhe foto komprometuese të 35-vjeçares me murgj të ndryshëm. Hetimet kanë çuar deri tani në përjashtimin e nëntë prej tyre nga urdhri manastiror, ndërsa autoritetet dyshojnë se numri i personave të përfshirë mund të rritet.
Skandali shpërtheu pas zhdukjes së abatit të tempullit Wat Tri Thotsathep Worawihan në Bangkok qershorin e kaluar. Abati dyshohet se kishte një lidhje dashurie me Wilawan, e cila pretendoi se ishte shtatzënë dhe i kërkoi 206 mijë euro. Pasi ai refuzoi të paguante, ajo zbuloi aferën, duke e detyruar të largohej nga vendi.
Një tjetër murg ka rrëfyer se i kishte dhuruar një makinë luksoze gjatë lidhjes me Wilawan, por më pas u shantazhua pasi mësoi për marrëdhënien e saj me një tjetër murg.
Sipas hetuesve, llogaritë bankare të 35-vjeçares tregojnë qarkullim parash mbi 10 milionë euro në tre vitet e fundit, ku një pjesë e konsiderueshme dyshohet se buron nga fondet e tempullit.
Autoritetet vijojnë hetimet për të zbardhur rrjetin e mundshëm të përfshirë në pastrimin e parave dhe aktivitetet e tjera të paligjshme të gruas./Euronews.AL/